ప్రభుత్వ ఉద్యోగానికి రాజీనామా చేసిన మహిళ.. ‘నేను తప్పు చేశానా?’ అంటూ వైరల్ పోస్ట్
ద్రవిడశక్తి జాతీయ డెస్క్: ప్రభుత్వ ఉద్యోగం సాధించడం ఎంతో మంది కల. ఆర్థిక భద్రత, స్థిరమైన ఆదాయం, సమాజంలో గౌరవం లభిస్తాయని చాలామంది ప్రభుత్వ ఉద్యోగాల కోసం ప్రయత్నిస్తుంటారు. అయితే, కేంద్ర ప్రభుత్వ ఉద్యోగానికి రాజీనామా చేసిన ప్రియా అనే మహిళ తన నిర్ణయంపై సందేహాలు వ్యక్తం చేస్తూ సోషల్ మీడియాలో చేసిన పోస్ట్ ప్రస్తుతం చర్చనీయాంశంగా మారింది. తాను సరైన నిర్ణయం తీసుకున్నానా? జీవితంలో పెద్ద తప్పు చేశానా? అంటూ ఆమె తన మనసులోని ఆలోచనలను పంచుకున్నారు.
“ఈరోజే కేంద్ర ప్రభుత్వ ఉద్యోగానికి రాజీనామా చేశాను. నేను జీవితంలోనే అతి పెద్ద తప్పు చేశానేమో అర్థం కావడం లేదు. చాలామంది అదృష్టంగా భావించే ఉద్యోగాన్ని వదులుకున్నానేమో అనిపిస్తోంది. అయితే, మనం ప్రయాణిస్తున్న బస్సు మన గమ్యం వైపు వెళ్లడం లేదని అనిపిస్తే ఏం చేయాలి? మన నిర్ణయం తప్పని ఇతరులు భావిస్తే, వారి మాట విని నిర్ణయాన్ని మార్చుకోవాలా? నిజానికి, ఇప్పుడు నేనేం చేయాలో నాకే అర్థం కావడం లేదు” అని ప్రియా తన పోస్టులో పేర్కొన్నట్లు సమాచారం.
ప్రతి నెలా క్రమం తప్పకుండా జీతం వస్తూ, జీవితం సాఫీగా సాగుతున్నప్పటికీ, రాబోయే పదేళ్లూ అదే విధంగా గడపాలని తనకు లేదని ఆమె వెల్లడించారు. భవిష్యత్తులో ఏం జరుగుతుందో తెలియకపోయినా, తనకు నచ్చిన దిశలో ముందుకు వెళ్లాలనే ఆలోచనతో ఈ నిర్ణయం తీసుకున్నట్లు ఆమె పోస్టు ద్వారా తెలుస్తోంది. అయితే, ఉద్యోగాన్ని వదులుకున్న తర్వాత తన నిర్ణయంపై సందేహాలు కలగడంతో, తాను తొందరపడి నిర్ణయం తీసుకున్నానా అనే ప్రశ్నను కూడా ఆమె లేవనెత్తారు.
ప్రియా పోస్టుపై నెటిజన్లు భిన్నాభిప్రాయాలు వ్యక్తం చేస్తున్నారు. తన నిర్ణయం సరైనదని మనస్ఫూర్తిగా నమ్మితే వెనక్కి తిరిగి చూడకుండా ముందుకు సాగాలని కొందరు సూచించారు. ఇతరుల అభిప్రాయాల ఆధారంగా జీవితాన్ని నడిపిస్తే అసంతృప్తి పెరిగే అవకాశం ఉందని మరికొందరు వ్యాఖ్యానించారు. తప్పుడు దిశలో ప్రయాణిస్తున్నామని గుర్తించినప్పుడు, ఆలస్యం చేయకుండా మార్గం మార్చుకోవడం మంచిదని ఇంకొందరు అభిప్రాయపడ్డారు. మొత్తానికి, స్థిరమైన ఉద్యోగ భద్రతకు ప్రాధాన్యం ఇవ్వాలా? లేక వ్యక్తిగత లక్ష్యాలు, సంతృప్తికి అనుగుణంగా కొత్త దారిని ఎంచుకోవాలా? అనే అంశంపై ఈ పోస్ట్ చర్చకు దా
రితీసింది.
