నేహా బోరాకు ఢిల్లీ పోలీసుల నోటీసులు.. అక్టోబర్ 29లోగా సమాధానం ఇవ్వాలని ఆదేశం
ద్రవిడ శక్తి జాతీయ డెస్క్: ఆల్ ఇండియా స్టూడెంట్స్ అసోసియేషన్ (AISA) అధ్యక్షురాలు నేహా బోరాకు ఢిల్లీ పోలీసులు మరోసారి నోటీసులు జారీ చేసిన వ్యవహారం చర్చనీయాంశంగా మారింది. శాంతిభద్రతలకు సంబంధించిన బాండ్ కేసులో పోలీసులు తమ వాదనలకు మద్దతుగా చూపుతున్న పత్రాలను ఆమె తరఫు న్యాయవాదికి అందించారు. ఈ పత్రాలపై స్పందించేందుకు నేహా బోరాకు అక్టోబర్ 29 వరకు గడువు ఇచ్చారు. ఈ వ్యవహారంలో తదుపరి చర్యలు ఆమె సమర్పించే సమాధానంపై ఆధారపడి ఉండనున్నాయి.
భారతీయ నాగరిక్ సురక్షా సంహిత (BNSS) సెక్షన్ 126 కింద అక్టోబర్ 17న ఢిల్లీ పోలీసులు నేహా బోరాకు నోటీసులు జారీ చేశారు. శాంతిభద్రతలకు విఘాతం కలిగే అవకాశం ఉందని పేర్కొంటూ రూ.10,000 పూచీకత్తు సమర్పించాలని ఆదేశించినట్లు సమాచారం. ఈ నోటీసులను సవాల్ చేస్తూ ఆమె ఢిల్లీ హైకోర్టును ఆశ్రయించారు. అయితే, ఆమె దాఖలు చేసిన పిటిషన్‌ను హైకోర్టు కొట్టివేసింది.
అక్టోబర్ 16న ఢిల్లీలోని మండీ హౌస్ ప్రాంతంలో తిరంగా మార్చ్ నిర్వహించడం, నినాదాలు చేయడం, జంతర్ మంతర్ వద్ద నిషేధాజ్ఞలు అమల్లో ఉన్నప్పటికీ నిరసన కార్యక్రమాలు కొనసాగించడం వంటి ఆరోపణలను పోలీసులు ప్రస్తావించారు. అదే రోజు కన్నాట్ ప్లేస్‌లో నిర్వహించే ప్రదర్శనలో పాల్గొనాలని ప్రజలను ప్రోత్సహించారన్న ఆరోపణలు కూడా ఉన్నాయి. ఈ పరిణామాల నేపథ్యంలోనే పోలీసులు నేహా బోరాపై చర్యలు చేపట్టినట్లు తెలుస్తోంది.
కన్నాట్ ప్లేస్‌లోని సెంట్రల్ పార్క్‌లో కాక్‌రోచ్ జనతా పార్టీ (CJP) నిర్వహించిన ‘లెహ్రా దో తిరంగా’ మార్చ్‌లో పాల్గొనేందుకు వెళ్తున్న సమయంలో అక్టోబర్ 16న నేహా బోరాను పోలీసులు ముందస్తు నిర్బంధంలోకి తీసుకున్నారు. మరుసటి రోజు ఆమెను విడుదల చేశారు. అనంతరం శాంతిభద్రతల బాండ్‌కు సంబంధించిన ప్రక్రియ కొనసాగుతోంది. ప్రస్తుతం పోలీసుల నుంచి అందిన పత్రాలను పరిశీలించి, అక్టోబర్ 29లోగా తన సమాధానాన్ని సమర్పించాల్సి ఉంది. ఈ కేసులో తదుపరి పరిణామాలు ఎలా ఉంటాయన్నది ఆసక్తికరంగా
మారింది.
