ఇడుపు కాయితం పాటపై వివాదం.. బంతి భోజనాల్లో మద్యం వడ్డింపు సీన్‌పై విమర్శలు!
ద్రవిడ శక్తి సినిమా డెస్క్: బన్నీ వాసు నిర్మాణంలో, నటుడు ప్రియదర్శి ప్రధాన పాత్రలో, నాగదుర్గ కథానాయికగా తెరకెక్కుతున్న ‘ఇడుపు కాయితం’ సినిమా మరోసారి చర్చల్లోకి వచ్చింది. సినిమా టైటిల్‌ నుంచి ప్రచార చిత్రాల వరకు ఏదో ఒక అంశంతో వార్తల్లో నిలుస్తున్న ఈ చిత్రం.. తాజాగా విడుదలైన లిరికల్ పాటతో వివాదానికి కేంద్రబిందువుగా మారింది. పాటలోని కొన్ని దృశ్యాలు తెలంగాణ సంస్కృతి, సంప్రదాయాలను తప్పుగా చూపిస్తున్నాయంటూ సోషల్ మీడియాలో విమర్శలు వ్యక్తమవుతున్నాయి.
వివాదానికి కారణమైన దృశ్యంలో నటుడు అభినవ్ గోమఠం వాటర్ క్యాన్లలో మద్యం కలిపి, పంక్తి భోజనాల్లో కూర్చున్న అతిథులకు మంచినీళ్ల మాదిరిగా వడ్డిస్తున్నట్లు చూపించారు. సాధారణంగా శుభకార్యాల్లో సంప్రదాయబద్ధంగా నిర్వహించే బంతి భోజనాల్లో ఇలాంటి సన్నివేశాన్ని చూపించడం ఎంతవరకు సమంజసమని పలువురు ప్రశ్నిస్తున్నారు. పాటలో సంగీతం, వినోద అంశాలు ఉన్నప్పటికీ, ఈ ప్రత్యేక సన్నివేశం మాత్రం ప్రేక్షకుల దృష్టిని ఆకర్షిస్తూ వివాదానికి దారితీసింది.
తెలంగాణ సంస్కృతిని కేవలం మద్యం, మాంసాహారంతోనే ముడిపెట్టి చూపిస్తున్నారా? అంటూ కొందరు నెటిజన్లు అభ్యంతరం వ్యక్తం చేస్తున్నారు. హాస్యం పేరుతో ప్రాంతీయ సంప్రదాయాలను కించపరిచేలా సన్నివేశాలు రూపొందించడం సరికాదని వారు అభిప్రాయపడుతున్నారు. మరోవైపు, ఈ దృశ్యాన్ని సినిమాకు సంబంధించిన కథా సందర్భంలో భాగంగా చూడాలని కొందరు సమర్థిస్తున్నారు. పెళ్లి అనంతరం జరిగే ‘నల్లపూసల వేడుక’ నేపథ్యంలో సన్నిహితుల మధ్య జరిగే సరదా విందును చూపించారని, దాన్ని వాస్తవ జీవితానికి పూర్తిగా అన్వయించకూడదని అంటున్నారు.
దీంతో ‘ఇడుపు కాయితం’ పాటలోని సన్నివేశం చుట్టూ సోషల్ మీడియాలో భిన్నాభిప్రాయాలు వ్యక్తమవుతున్నాయి. కథకు అనుగుణంగా వినోదాన్ని అందించడం ఒకవైపు, ప్రాంతీయ సంస్కృతి, సంప్రదాయాల పట్ల గౌరవాన్ని కాపాడటం మరోవైపు అనే చర్చ సాగుతోంది. ఈ వివాదంపై చిత్ర బృందం స్పందిస్తుందా, రానున్న రోజుల్లో సినిమాకు సంబంధించిన ప్రచారంపై దీని ప్రభావం ఉంటుందా అన్న
ది చూడాలి.
